黃子華自編自導自演嘅賀歲電影《乜代宗師》即將上映，惟最近已在戲迷間引起熱議，有人批評子華收取巨額片酬，剥削咗工作人員，同埋令到有啲場景唔夠錢拍，要去深圳取景。
（大會提供）
有汗出冇糧出
子華尋日就罕有咁拍片為自己嘅心血結晶大平反，其實子華不特止冇收錢，更加係自掏腰包斥巨資去拍《乜代宗師》：「想同大家講一樣嘢呢就係……其實呢套戲呢係剥削晒所有人，台前幕後都畀我「揼心口」，『唔該唔該唔該，平啲平啲平啲』，因為真係唔夠錢。咁我自己點呢？我係做編劇、導演、演員，一毫子都冇收過……唔單止係一毫子都冇收過，真實嘅情況係我賣咗一躉樓嚟到拍呢套戲。」
子華今次真係碌盡人情卡。（影片截圖）
（左起）C君、細細粒、蝦頭、心悠、同許紹雄，都唔係新人，相信都係收友情價。（大會提供）
原汁原味一套本土電影
子華解釋呢套唔係外間傳聞嘅「合拍片」：「我第一日拍呢套戲嘅心態已經係完全淨係想拍畀香港人睇、一套香港嘅戲。點解唔揀合拍片呀？因為我就係想好自由自在咁拍呢套戲，無論題材、表達手法，我唔想有人去Censor（審查）我應該係點樣點樣拍；乜嘢可以拍；有乜嘢唔可以拍……我想自由自在忠於我嗰套戲嘅Concept（概念）。」
（大會提供）
打定輸數蝕錢
子華苦笑強調佢嘅心態係想拍一套淨係畀香港人睇嘅戲，亦預咗蝕錢：「前幾日我行街撞到記者衝埋嚟問：『子華你套戲就上喎，係咪好有信心呀？』，我當時已經同佢講「冇信心，係輸少當贏」，好坦白講如果大家都知道香港呢個市場（係咩情況），我冇諗過賣咗躉樓嚟拍呢套戲係可以幫我搵一躉樓㗎。基本上以我依家呢套戲嘅Budget（預算）係冇可能，除非有奇蹟啦，係冇可能可以翻本。我甚至冇諗住賣咗呢躉樓，呢躉樓可以返到嚟，我只係諗佢有冇可能可以返番間房呢；或者返番個廁所呢？就算淨係返番個水龍頭，我都係預咗嘅、唔緊要嘅，但我可以自由自在拍呢一套戲。好唔好睇？點知啫，但起碼一樣嘢，我覺得，忠於自己先啦。」
(大會提供)
深圳取景原因
子華話呢套戲的而且確係返咗深圳拍部分嘅戲，因為實在係唔夠錢：「對上一次《一蚊雞保鑣》我拍26定唔知28日，當時已經有人同我講：『嘩！子華你呢套戲咁奢侈，你嗰套我拍3套都得喇。』我自問我冇呢個咁嘅能力。我問一啲好熟行嘅監製，我賣咗躉樓可以拍幾多日呀喺香港？佢話可以拍15日。但我呢套戲需要拍50日，我依家好似起一層樓咁，我認為我要50日我先至可以做到一躉堅固嘅樓，我能夠夠膽畀人住、畀人睇嘅樓。可能有啲導演好熟練，佢真係可以好快拍完嘅，我真係冇呢個能力。」佢講到如果要喺香港拍50日佢傾家蕩產都唔夠錢，但佢仍希望喺有限預算下做到最好，做一套有質素嘅戲，所以只能夠行呢一步。
（影片截圖）
子華對上一次執導已經係17年前嘅《一蚊雞保鑣》。(《一蚊雞保鑣》截圖）
「假作真時乜都假」
子華引用《乜代宗師》中嘅一句「假作真時乜都假」：「我覺得有啲唔真確嘅嘢我要同大家澄清一下。呢一套戲，就係一個傻佬賣咗躉樓……全行都認為我傻佬嚟㗎喇。賣躉樓去拍，係多數……係99%係冇得翻本,就係一套咁嘅戲面對住咁嘅環境，咁樣做咗出嚟嘅一樣嘢。
最後子華雖然強顏歡笑，但感覺面上仍難掩佢畀人誤會嘅委屈神情：「我希望講返個真實嘅情況畀大家聽，睇唔睇，唔係好緊要。好，多謝大家。」
（影片截圖）
（影片截圖）
有唔少網民都好心痛子華被誤會，話未見過佢個樣咁灰心咁委屈，更留言力撐佢係一個真正嘅藝術家，為咗創作自由而賣樓嘅風骨真係冇幾多個人有。更有人揚言要以行動支持，入場睇N次同子華一齊創造票房奇蹟。
撰文: 黃蘊姿